Es waren einmal 12 Monate, die dauerten vom April 96 bis März 97. Während dieser Zeit träumten 12 Bikers und zwei Aufsässige von einer tollen, regenfreien und ausrittreichen Töffsaison.

Dä April – dä April, dä macht jo wa er will. Äm Paul sini erscht Töffahrt ischt au viel z’schnäll gsi, denn Polizei häts gmerkt und s’Portmonai häts gschmerzt. Vom Motocross Frauenfeld chömmer nöd viel vozellä, denn d’Redaktoren händ nöd luegä wöllä.

Da waren’s nur noch 11

Im Mai – im Mai, sind vor luter Rägä alli Strossä frei. Üsi Töff blitzblank, volltankt, schmierglät und poliert, vom Töff-Fit nonöd ganz erholt, werdät a dä Pfingstä au no gschont. Dä Hampi sin Töff isch chogä froh, denn statt sin Töff, hät dä Bodä s’Oel übercho.

Da waren’s nur noch 10

Im Juni – im Juni hät d’Sunnä endli mol gschunä. D’Organisatorä vom Töff-Rallye händ super Sachä bottä. Bikers und die Ufsässige händ nüd gha zum Spotä. S’Iweihigfäscht bim Andy und dä Claudi isch lang höckläd, g’witzlät und viel glachät wordä. D’Blondinä und d’Öschtricher händ bim Witzlä müessä dra glaubä, dass d’Sabine hät müessä dä Marcel afuchä.

Da waren’s nur noch 9

Im Juli – im Juli bruchät d’Frauä kein Pulli, sie rüfäd Judi-Huli, denn s’Wetter isch gsi, wies söd si im Juli. Sie händ kurvät um alli Eckä, um Gruyère zu entdeckä. D’Lachmusklä händ Chrämpf und vom vielä Ässä d’Vodauig kämpft. Bim Hampi-Fäscht hämmer g’fäschtät wie 20-jöhrigi Kit’s, öpä ein hät mitgno än Schwip’s. Dass üsi Musklä nümmä jung sind, merkt Sonja g’schwind.

Da waren’s nur noch 8

Im August – im August git’s wieder än Fruscht. D’Usfahrt in Jura goht Futsch, drum gömmer am 1. August uf d’Hundwiler Höhi und machät mit Bierfläschä än Putsch. Am Endi vom Monät tuschät vier Biker ihri Töffstiefel und ruuschät mit Rucksack und Wanderschueh über Berg und Tal für bevorstehendi Alpäroutewahl.

Da waren’s nur noch 7

Im September – im September gits neui Datä im Kalender, a dä VV werdät d’Maja und dä Marcel provisorisch ufgno und s’Winterprogramm isch agno. Wie chönt’s au anders si, d’Alpäwanderig isch nöd gsi. Stattdessä händ mer gässä, Tartar – mhh, isch das ä Frässä.

Da waren’s nur noch 6

Im Oktober – im Oktober sind Mannä in Bern am umätobä! Uf dä Usfahrt hät’s sogar mol gä, dass Gschwindigkeits-Taflä händ gseh !!!!!!! D’Frauä sind in ä feini Beiz und dänn händs dä Bowlingchuglä igheizt. Do hät vo luter Ifer d’Regula fascht s’Publikum mit dä Chuglä troffä, die hinter ihrä händ um ihri Sicherheit müessä hoffä.

Da waren’s nur noch 5

Im November – im Rebmevon gänd d’Frauä sich äs Telefon, denn dä Tartarä-Huet i dä Waldegg, hät ihren Hunger gweckt. Am Fondueobig im Untere Brand händ alli guet gfischt, denn dä Chnobli isch in Strömä uftischt.

Da waren’s nur noch 4

Im Dezember – im Dezember hät mer sich wieder a Quartiervaria remembert. I jederä Beiz hämmer zünftig hinderä kippät und nochher sind alli mit äm Bruno sim Ford hei gwippät. Am Silvester hämmer üsäs z’Nachtässä nöd gratis übercho, hämmer doch bi Nacht und Näbel z’Fuss uf d’Scheidegg müessä go.

Da waren’s nur noch 3

Im Januar – im Januar trinkt d’Sonja Williams klar. Sie siehts denn nümä so, drum händ mer sie is Bett inä gno. Am Morgä hämmer d’Schlittä unter s’Füdli gno und äs isch zunärä rasantä Abfahrt cho. Am Schlittelobig häts zwenig Schnee gha für Kufä, drum simmer uf dä Kunstpiste vom Bömmeli mit de Schi umekurvät.

Da waren’s nur noch 2

Im Februar – im Februar wie wahr, fangt scho bald wieder Töffsaison a. Aber zerscht hämmer mit dä Schlittschueh no än Stamm und s’Grüsch am Schiweekend fühled mer üs au wie deham! Döt hät’s no ä lässigi Musik geh und bim is Bett go hämmer fascht scho z’Sunnä gseh.

Da war’s nur noch 1’er

Im März – im März, dass isch kein Scherz, gend üs d’Bruno und Sabine z’ghörä, si werdät än Nochwuchs gebärä. S’Neu Summerprogramm hämmer erstellt, d’Maja und dä Marcel in Club definitiv inä gstellt. Provi-sorisch hämmer d’Mica, dä Roli, d’Moni und d’Carmen ufgno und äm Schluss no zwei grossi Torte vom Bruno übercho. Dä Bruno Mohn isch wieder Vater wordä, jetzt chan er sich sowieso nur no um Familiä sorgä.

Dies ist die Geschichte von den 12 Biker’s und den zwei Aufsässigen und wenn sie nicht gestorben sind, werden jetzt 15 Biker und 4 Aufsässige wieder ein Jahr miteinander verbringen, egal, ob es regnet, schneit oder die Sonne scheint.

D‘ Autorä Regula, Sönä und Paul