Im Johr ’99 häts im MC nöd so riesigä Bewegigä geh. Mer händ kei neui Mitglieder und Babies übercho und die gmeinsam gfahrnä Kilome-ter chömät nöd is MC Guinnessbuech.
Am 1.5. hämer wieder emol äs Töff-Fit cha. D’Sönä isch nöd bis uf Abtwil cho, sie hät d’Schrubschlüssel scho vorher bruucht. Churzer-hand hät mer s’Töff-Fit uf Waldstatt verleit!
Wer än guetä Spruch weiss, wa mer am 13.5. a dä Uffahrt gmacht händ, dä söll’s ufschriibä und a dä VV vozählä.
Spruch: _________________________________________________
A dä Pfingschtä häts nur bim Abäfahrä grägnät, denn als mer usäm Tunnel usächo sind, händ mer schönschti Wätter gha. D’Chuchi dunä hät voalasst, dass mer dä Gurt händ muessä wietermachä. D’Usfahr-tä sind kurvig und stark befahrä gsi, nur mit dä Hochziitsuitä vom Beat und dä Sönä sind’s nöd so zfriedä gsi (Kajütenbett).
Am 29.5. händ sich d’Maya und dä Marcel uf dä Schwägalppass-höchi s’Jowort geh. Aschlüssend isch die ganz Bandi mit dem Geld, wo’s übercho händ, is Rest. Trübli gfahrä und händ äs guets Plättli gäsä.
S’Töffrallye vom 13.6. isch wäg dä wenigä Ameldigä uf dä Herbscht voschobä wordä, doch als es so wiit gsi isch, händ sich d’Ameldigä nöd erhöht, drum hät mers abgseit.
Am 3.7. händ Bösches igladä. Es isch guet gässä, viel trunkä und blödlät wordä. Eis Mitglied isch denn au mit blauä Fleckä heicho, weil sie sich nümä uf äm Bank hät mögä hebä. D’Frauäusfahrt uf Grosskirchheim (A) über dä Grossglockner hät i jederä Hinsicht üsi ‹Füdli› strapaziert. Am Samschtig simmer ca. 400 km mit äm Töff gfahrä, am Sunntig 10 km uf am Ross grittä und bi dä Heifahrt am Mäntig hät sich jedi gwünscht äs Chüssi zha.
Trotz schönäm Wätter isch dä 1. August bi dä Fämily Gemperle, nöd mit viel Lüt, gsi. Me hät’s trotzdem gnossä im chlinä Chreis und hät än hufä Fürwerk gschmarotzerät.
D’Alpärundfahrt hät üs is Wallis gführt, wo denn au än hufä Raglett gässä wordä isch. Am Sunntig hät mer denn ä wunderschöni Usfahrt über Italiä gmacht. D’Regula häts gnossä als Sozius, hät sie doch jedesmol bimänä Halt ä suurgschprützti Schtangä bschtellt, zum Vodruss vo dä Fahrer.
S’Pirätfäscht vom Hampi und dä Carmen isch am 28.8. und äm 6.11. is Wasser gheit. Däför händ’s üs ä super ***** – Menue serviert und äs isch riesig gmüetlich gsi.
D’Alpäwanderig hät am 25.9. söllä stattfindä, doch dä Petrus häts usgrächnät a dem Wuchäend wieder emol wöllä füecht ha.
Am 8.10. hämer wieder emol än Schtamm a dä Olma im Tessiner-schtübli durägführt. Nochänä simmer uf Top Spin wo’s nöd allnä so wohl gsi isch, vorallem nochher!! I änärä Bar hämer schpöter no wieter trunkä und au no s’Tanzbei gschwungä.
D’Herräusfahrt isch, wer weiss äs?? . . . uuuf Münchä, wie all zwei Johr, so langwilig. Aber d’Frauä, über die git’s viel zvozählä.
Dä meischt bsuechscht Obig vom ganzä Johr isch dä Fondueplausch Endi November im Rest. Alpärosä. Z’Fuess dur dä tüf Schnee, mit Taschälampä, Chind und Hund händ mer üs den hungrig ufs Fondue-caqulón gschtürzt. Dä Wi, Kirsch und d’Schtumpä händ üs guet zuezsait.
<span»>D’Wirtschaftschund a dä Quartiervaria (SG – Marktplatz Nord) häd sich wiederemol glohnt, hämer doch neui Beizä kennäglärnt.
Am Silvester simmer alli i Etappä abentürlich mit Schlittä, Bob oder Schi vom Kronberg i d’Scheidegg gfahrä. Döt händ mer s’Millenium mit ämänä Scheidegg-Cafi begrüesst.
Üsän Alass am 8.1.2000 is Alpamare händ schlichtwäg kei Aklang gfundä, weil’s alli vogässä händ.
Es isch jo bekannt, dass mo uf ä Wandrig än chlinä Snack und z’Trinkä im Rucksack hät. Da händ üsi drü Nachtwanderer nöd so richtig glaubt. Sie sind den au sehr durschtig und hungrig in St. Gallä acho, weil jedi Beiz uf äm Wäg zue gha hät.
Bi viel Schnee und Wärmi hämer üsäs Skiweekend uf dä Ebenalp durägführt. Am Obig isch wie vogiftät Hosäabä gschpielt wordä. Dä Andi hät mit sinä Snowblades än hufä Purzelbäum gschlagä und isch ä paarmol zum Schilift usägheit. Am nöchschtä Obig hät er so Muskel-kater gha, dass er ä langs warms Bad hät müessä neh.
Am 11.3. isch s’neui Huus vo Okle’s mit ämänä Spaghettiplausch igweiht wordä. Sechs voschiedini Sossä sind mitbrocht wordä. Am Ässä und am Schnaps hät’s üs nöd gmanglät.
A dä vorgängigä Vorschtandsitzig isch dä Kurt als neus provisorisches Mitglied ufgno wordä. Zum Glück weiss dä Küdä wa än Töff isch.
A dä HV hät’s im Vorschtand no Voändrigä geh. Dä Marcel wird neu Bisitzer, dä Beat Vizepräsi und d’Sönä Aktuar. Dä Paul und dä Bruno bhaltät wie ghabt ihri Ämtli, weil sie’s zu üserä absolutä Zfriedäheit usführät.
LAST BUT NOT LEAST
Mer wünschät allnä Mitglieder wieder ä super Töffsaison und denä, wo ä Allergie uf dä Alkohol händ (gell Paul), empfählät mer, ä chli chürzer zträtä! D’Autorä Regula & Sönä
